Eph 6 | BEF | STEP | Panala'i pana'i lenali Sipi Bomofi kumu lite kehelite itotinigi afotinigihi agoya hu epite enali ka'ani keheli epilo. Yauba ya'ma lenali kapo lamana'a hokolo nohibe.

Ephesians 6

Yagapana'magi to ito'anigi afo'anigi lolo hite minete hilana ka

1 Panala'i pana'i lenali Sipi Bomofi kumu lite kehelite itotinigi afotinigihi agoya hu epite enali ka'ani keheli epilo. Yauba ya'ma lenali kapo lamana'a hokolo nohibe. 2 Keya kaguti ana'ina huto hilibe luto molo'ehina kamo hiti kohe toto lu'ehina ka ni'ibe. Ma luto lu'ehinamo ni'ibe:Lenali itotinigi afotinigihi enigi'ani le'mo saga hilete melugu mino bati hite kana'a yatama minoba minoba minalata'mu yabe luto lu'ehinamo ni'ibe.

4 To ito'anigita afo'anigita lenali ya'ma yagapanatini enele'mo enitaluga binogo li sibina mehilo. Lenali Hu'mamofihi ka'amu enegekesa linogo keheli fotogo hite kaga'a lu epilo. Kaba hi neepelenogo mono kagu hofa talabe.

Kele kele bona'i enigina bona'i lolo hite minete lite hilana ka

5 Kele kele bona'i lenali metoga enikibina bomagihi koli hite agoya hu epelenogo ka'ani kehelinogo komopatini lamana hinogo Kilisitohi suhi hite agoya hi ete'ahanamofihi ya hite kehelilabe. To lenali kumu kehelinogo keta mehinogomo fulu hite minete kaga'ani kehelilo. 6 Lenaliya enikibina bo lenugufa lenemehi epite agoya nehi epelenogo yamofihi lenubu genogo bati hilibe luto ni'igopa lali Kilisitohi ya suhi kele kele'i hu etoto minalune lilete Hu'mamofihi fokehi lu lepalalina suhi hite minalo. 7 Bona'i lenali kumu keheli'ahana ni'igopa Sipi Bomofihi kehelite komopatinigu babahi hinogo foya'a kosele kasele mehese lilo. 8 Lenali ya'ma keheli'ahabe. Mone'a enali koko pana'a nehanana'a to enigihiti bo lolo hite nehana'a enali lamana'a lolo hite hi'ahanalo'i Sipi Bouba nona'a epilina ni'ibe.

9 To lenali hiti bona'i lenali koko yagapanatinimagihi ana hite keheli bati hi epelete ana suhi hite enehe'mete luba ka lu meepilo. Ya nehite ma lite kehelilo. Koko yagapanatini hiti to lenali hiti ya'ma kokulumagu Sipi Bo afotinigu moneko'i nohibe. Ai enigihiti bona'i to enigi menina bona'i moneko legege nehabe luto kehelito bona'i silaga'i kaba hulata nohibe.

Hu'mamofitogati gimi mage'i luba nasana li lenayanugu malalune

10 Lu su hoto lilube. Hu'mamofitoga bite i ke'menogo ai amuyana'a napa huto lenalitoga ni'inogo yanamofihi komopa'agu mine lite tite ule'ale hilo. 11 To Satau ai suguna'i lenimi'i malalube'mu nohinogomo lenele'mo sibina hu lalibe luto Hu'mamofitogati gimi mage'i luba nasana asaga'i li lenayanugu melelete minete kaba hite minalo. 12 Lenali ya'ma akeheli'ahabe. Lali fa'mene lugufa hiti bona'magita luba sabo menohune. Metepu kapo kaba nehana to Satahi kaba bo'a hiti enikibina bo sipi'a to sipi bo amuyana'a nehananamagi to foipa kene'i samahi tito kokuluma megesa'aga neminana enali luba li huto hu limilata nehabe. 13 Lenali yana'mu Hu'mamofitogati gimi mage'i luba nasana lilete minete luba laga mehina'a amuya melete nehinogo fatehatini enali ete luba hilube'mu nehinogo lenali analo'i amuya melete minete koli mefelese ule'ale hite minalabe.

14 Lenali ya hite ho ti kibi kibi hite minalo. To gimi bona'i nehepilata gu kata legi huto lenali Hu'mamofihi hetofa kaga'a gilimitini lolo hinogo gu katatini ho bite minete to ai'a bebe sose hapa'a kefe gutini lolo hinogo bite fonokotini kaba hinogo minalo. 15 To Hu'mau bona'i enele'mo fulu hilata nohina ka lamana'a lite minalana yanauba enigigusagu fegu lolo hu lepelenogo kapo melete minalo. 16 Yalo'i Hu'mamofihi keheli amuya emi'ahananauba helegutini lolo hinogo asaga yupahi so kite nehinogo Satahi gimiguti mage'mofihi logo'a bu nebe liginogo yanamofihi li sabalina'mu yabe. 17 Ya nehinogo Hu'mamofihi lenubuto bilatana kapaloti suhi huto kakili'i lolo hinogo yamofihi lite i kolo bilete minalo. To Hu'mamofihi kaga'a yauba emita'i yatama lolo hinogo yamofihi lite minalo. Ana emita'i Sikalafu'mofihi emita'a ni'ina yabe. 18 Ya nehite lenali silaga kanagu Hu'mamofihi Sikalafu'uba lenehe'menogo Hu'mamofitoga minete lehe'mobo lite buka tite minalo. To iyo iyo hite kosele'i kasele'i melenehenogo kaba hite minalo. Ya nehite Hu'mamofihi bona'i yege yege'namu'i yabe lite nunumu foya lite minalo. 19 Ya nehite nani kumu ya'ma nelesa melinogo Hu'mamo nabaga'ni le'mo babahi hulenogo hetofa ka lamana'a suguna'i ni'ina yamofihi nabaga li gelehe hinogo babahi hulenogo lu huto hilibe lite lenali Hu'mamofitoga lilo. 20 To nani ana huto hetofa ka lamana'a kumu yabe luto Hu'mamofihi kaga leli'ali hulata bo naga nonugu nohunaya Hu'mau lu netalina ka nelesa melinogo lu huto hilibe lite nani kumu Hu'mamofitoga kehe ilo.

Fayahi koyoto su halina ka

21 Minoto lito nohuna yamofihi hapa'a to foya'a lilata nohuna yamofihi kehelilabe luto Tikiku ai'ya buto ka lu lepilube'mu nohibe. Ai lalalutifu lamana'a Sipi Bomofihi agoya pana'a foyagu amuya moloto mino'ehina bo yabe. 22 Ai lali malo nominana ka asaga'namofihi lenali kagalo lu lepito komopatini le'mo amuya hilibe luto ho lufugo foiya nobibe.

23 Afotifu Hu'mau to Sipi Bo Yesu Kilisito ai nigibo nalalu'nigita lenali fuluna li huto huto molo lepoloto keheli amuya melelatanatini li futili hu lepelenogo komopatini ai eminogo ai eminogo hite minalabe. 24 Sipi Boti Yesu Kilisitotoga i hepinogo komopatini emilata nehana bona'i lenalitoga Hu'mamofihi lenehe'mose'na'a yamofihi minomo buto minalibe.